Yuav Pov Ntawv Li Cas Yog Hais Tias…
Minnesota tsab cai lij choj muab ntau cov kev xaiv tshwj xeeb rau txoj kev pov ntawv xaiv tsa nom tswv. Nias hauv qab no seb cov no ib qho twg puas siv rau koj.
Kuv yog ib tus neeg kawm ntawv
Yog hais tias koj yog Minnesota ib tus neeg kawm ntawv, tej zaum Minnesota yuav yog koj lub xeev uas koj nyob los yog tej zaum yog koj tsiv lwm lub xeev los. Peb yuav teb rau cov nqe lus uas kheev nug uas peb paub tias tej zaum cov neeg kawm ntawv muaj li hauv qab no.
Kuv qhov chaw nyob pov tau ntawv yog qhov twg?
Koj yuav rau npe pov ntawv tau uas yog siv qhov chaw nyob tam sim no uas koj muab xam tias yog koj lub tsev; qhov no kheev yog lub tsev kawm ntawv qhov chaw los yog ib leej niam txiv/tus saib xyuas lub tsev. Yog koj tseem rov qab mus saib tsev tab sis tsis muab xam tias yog koj lub tsev lawm, ces koj rau npe pov ntawv rau ntawm qhov chaw uas koj nyob thaum koj mus kawm ntawv.
Yog koj tsiv lwm lub xeev los rau hauv Minnesota thiab tam sim no muab Minnesota xam tias yog koj lub tsev, koj tuaj yeem pov ntawv tau ntawm no tab txawm yog koj them nqi ntawv nyob tawm-sab-nraum lub xeev los yog muaj ib daim ntawv tso cai tsav tsheb los ntawm lwm lub xeev.
Yog koj tsis xam tias koj qhov chaw nyob thaum kawm ntawv yog koj lub tsev, koj tuaj yeem ua ntawv thov los mus xaiv tsa los ntawm kev xa ntawv tuaj ntawm qhov chaw uas koj muab xam tias yog koj lub tsev. Yog koj lub tsev qhov chaw yog nyob hauv Minnesota, koj tuaj yeem ua ntawv thov online kom tau daim ntawv xaiv tsa; tsis li ntawd ces, mus saib koj lub xeev qhov chaw xaiv tsa lub website, kom tau cov lus qhia tias yuav pov ntawv xaiv tsa thaum tus neeg tuaj tsis tau rau ntawm qhov chaw xaiv tsa (absentee) tau li cas raws li koj lub xeev cov cai lij choj.
Kuv puas tuaj yeem rau npe xaiv tsa hauv kuv lub tsev lub xeev thiab kuv lub tsev kawm ntawv lub xeev ob qho tib si?
Tsis tau, koj yuav tsum rau npe thiab pov ntawv xaiv tsa hauv ib lub xeev nkaus xwb. Koj yuav xaiv tau seb lub xeev twg thiab qhov chaw nyob twg uas koj muab xam tias yog koj lub tsev.
Yog hais tias kuv rau npe pov ntawv xaiv tsa hauv Minnesota tab sis kuv tuaj lwm lub xeev tuaj, kuv puas yuav tsum tau hloov kho kuv daim npav ID rau Minnesota?
Tsis hloov, koj tsis tas yuav tsum tau hloov kho koj daim npav ID rau Minnesota kom thiaj yog ib tus neeg rau npe pov ntawv tau ntawm no.
Kuv tsis yog nyob hauv Minnesota, tab sis kuv yuav tsum muaj Minnesota ib qhov chaw nyob rau npe nrog kuv lub tsev kawm ntawv kom thiaj muaj cai tau txais nyiaj txiag pab kawm ntawv. Kev rau npe los mus pov ntawv xaiv tsa thiab txoj kev pov ntawv xaiv tsa hauv kuv lub xeev puas muaj teeb meem dab tsi cuam tshuam ntsig txog kev nyob los yog nyiaj txiag pab kawm ntawv nyob ntawm kuv lub tsev kawm ntawv?
Tej zaum yuav muaj. Koj yuav tau nug koj lub tsev kawm ntawv fab tswj hwm thiab qhov chaw saib xyuas nyiaj txiag pab kawm ntawv saib seb lawv puas yuav muaj tswv yim pab tau koj li cas.
Kuv ntshai tsam kuv tsis muaj kev nyab xeeb
Cov neeg pov ntawv lub npe thiab chaw nyob yuav muaj lwm tus pom thaum lawv rau npe los mus pov ntawv xaiv tsa. Tab sis li cas los, yog hais tias lawv txhawj tias tsam tsis muaj kev nyab xeeb los yog tsam lwm tus paub, nws muaj cov hau kev los mus rau npe thiab pov ntawv xaiv tsa yam tsis muaj qhov ua rau lwm tus paub.
Qhov kev pab cuam Safe at Home txoj kev ua kom tsis muaj neeg paub qhov chaw nyob
Kom muaj cai koom tau rau hauv qhov kev pab cuam Safe at Home, koj yuav tsum:
Nyob hauv Minnesota.
Sau kom tiav ib co lus tias koj ntshai tsam muaj kev phom sij rau koj los yog tsam tus neeg nyob nrog koj muaj kev phom sij.
Rau npe rau hauv qhov kev pab cuam Safe at Home uas yog hu rau 1-866-723-3035 cov hnub ua hauj lwm txij thaum 8 a.m. txog 3:30 p.m. Qhov rau npe no yuav siv tau mus ntev txog plaub xyoos, tom qab ntawd ces yuav tau ua ntawv thov kom ncua ntxiv mus.
Cov kev xaiv ua tau ntxiv
Koj tuaj yeem ceev tau kom tsis muaj leej twg paub txog tej ntaub ntawv qhia paub tias koj yog leej twg uas yog xa ib daim ntawv foos hu ua Request to Withhold Voter Information from Public Information form (PDF) mus rau Ramsey County Elections. Koj lub npe thiab chaw nyob tseem yuav tshwm nyob rau ntawm daim ntawv teev cov neeg pov ntawv xaiv tsa nyob ntawm qhov chaw xaiv tsa nom tswv tab sis yuav tsis muaj rau tsoom neeg sawv daws pom.
Koj tuaj yeem xa tau daim ntawv foos Request to Inactivate Voter Record form (PDF) mus rau Ramsey County Elections. Qhov no yuav pov thaiv kom cov neeg ua hauj lwm saib xyuas kev xaiv tsa tsis txhob pom tej ntaub ntawv nyob hauv qhov chaw uas khaws cov neeg xaiv tsa cov ntaub ntawv cia ntshe ho yog yeej xav nrhiav kom tau koj cov ntaub ntawv no xwb. Tom qab cov neeg ua hauj lwm saib xyuas kev xaiv tsa ua kom tsis pom tus neeg pov ntawv xaiv tsa cov ntaub ntawv lawm, koj yuav tsum rov-rau npe dua ua ntej yuav pov ntawv xaiv tsa ntxiv.
Koj tuaj yeem rau npe dua ib zaug ntxiv nyob rau ntawm Hnub Xaiv Tsa, ceev koj tej ntaub ntawv kom tsis muaj lwm tus paub thiab saib tsis tau koj cov ntaub ntawv. Koj yuav nqa tau cov ntawv foos uas tau hais los saum toj saud nrog koj thiab muab rhais nrog koj daim ntawv thov rau npe. Peb yuav muab koj cov ntaub ntawv ntaus nkag rau hauv lub xeev qhov chaw khaws cov neeg pov ntawv xaiv tsa tej ntaub ntawv tom qab qhov kev xaiv tsa tab sis yuav muab cim tias yog khoom ntiag tug tsis pub lwm tus paub.
Kuv yog ib tus neeg tsis muaj tsev nyob
Yog hais tias koj tsis muaj tsev nyob, koj tuaj yeem rau npe pov ntawv tau uas yog siv qhov chaw uas koj pw ua koj qhov chaw nyob; qhov no yuav yog ib lub tsev nkaum (shelter), ib tus phooj ywg lub tsev los yog ib qhov chaw twg nyob sab nraum zoov.
Kev Rau Npe ua ntej Hnub Xaiv Tsa
Yog hais tias koj pw sab nraum zoov, koj sau piav qhia rau ntawm koj daim ntawv thov rau npe xaiv tsa; piv txwv, “Sab Qaum Teb Hnub Poob ces kaum ntawm txoj kev Rice St. & University Ave.” Yog koj muaj ib tus xov tooj los yog email, koj qhia tau cov no tsam peb muaj lus nug tias koj nyob qhov twg.
Yog hais tias koj pw sab nraum zoov, koj sau piav qhia rau ntawm koj daim ntawv thov rau npe xaiv tsa; piv txwv, “Sab Qaum Teb Hnub Poob ces kaum ntawm txoj kev Rice St. & University Ave.” Yog koj muaj ib tus xov tooj los yog email, koj qhia tau cov no tsam peb muaj lus nug tias koj nyob qhov twg.
Yog hais tias koj rau npe ua ntej Hnub Xaiv Tsa rau ntawm ib qho chaw nyob sab nraum zoov, koj cov ntaub ntawv rau npe yuav muab cim cia tias “challenged” (muaj teeb meem me ntsis) vim lub county yuav xa tsis tau daim npav qhia tias muaj tseeb tuaj rau koj. Koj kuj tseem tuaj yeem pov ntawv tau nyob rau ntawm koj qhov chaw pov ntawv xaiv tsa, tab sis yuav hais kom koj tsa tes cog lus tias koj yeej nyob qhov chaw ntawd tiag. Yog koj nyob hauv ib lub tsev nkaum (shelter) los yog ib qhov chaw uas xa tau ntawv tuaj rau koj, koj yuav tsis tau txais ib tsab ntawv tias muaj teeb meem me ntsis yog hais tias lub county tuaj yeem qhia tau tias qhov chaw ntawd muaj tiag.
Kuv muaj ntaub ntawv ua txhaum cai
Koj muaj cai pov ntawv xaiv tsa hauv Minnesota tab txawm koj muaj ntaub ntawv ua txhaum cai tshwj tsis yog tam sim no koj tseem raug kaw vim tau ua txhaum cai loj.
Kuv nyob rau qab tswj hwm ntawm lwm tus
Tshwj tsis yog ib tus kws txiav txim plaub ntug xaaj tsis pub koj mus pov ntawv xaiv tsa, koj muaj cai mus pov ntawv thaum:
- Koj nyob rau qab tswj hwm ntawm lwm tus.
- Tsev hais plaub tsa muaj ib tus neeg saib xyuas koj.
- Koj muab cai rau ib tus neeg txiav txim sawv koj cev.
- Koj muaj ib qho raug mob rau paj hlwb.
- Koj muaj ib tus mob xiam oob qhab loj hlob qeeb.
- Koj muaj ib tus mob hlwb khiav qeeb.
- Koj muaj ib tus mob cim xeeb tsis zoo.
Tsis muaj lwm tus muab tau qhov kev txiav txim siab no sawv koj cev, xws li koj tus txij nkawm, cov me nyuam, cov kws lij choj, cov neeg tu koj, cov kws kho mob los yog cov kws tu neeg mob.